یہ کہانی سچی اور اصلی ہے۔ تمام کرداراحتیاط سے دانستہ فرضی کردئیے گئے ہیں‘ کسی قسم کی مماثلت محض اتفاقیہ ہوگی۔
محترم حضرت حکیم صاحب السلام علیکم! سنا ہے اور کئی دفعہ فون کرکے بھی دیکھا آپ سے ملاقات کا وقت ملنا مشکل ہے تو سوچا کہ کیوں نہ آپ کو خط ہی لکھ دوں۔ عبقری سے پتہ نہیں کب میرا سلسلہ جڑا کچھ یاد نہیں بس اتنا یاد ہے کہ 2015میں کہیں عبقری پڑھا اور پھر پڑھتی گئی پھر جولائی 2015سے اپنا لگوالیا۔ عبقری پڑھنا میرے معمولات میں شامل ہوتا گیا۔ ٹوٹکے آزماتی تھی تو کامیاب ہوتے‘ دعائیں پڑھتی تھی تو سکون ملنے لگا پھر جب گھر میں انٹرنیٹ لگوایا تو آپ کے درس سننے لگی۔ آپ کے درس سننے کے بعد شوق جنون میں بدلتا گیا۔ اب تو ماشاء اللہ میں نے آپ کے درس کے دوران ہی جب آپ نے فرمایا کہ بیعت کرنے والے حضرات بیعت کرلیں تو میں نے بیعت کرلی۔میں سمجھتی ہوں کہ اصل بیعت تو دل کی بیعت ہوتی ہے وہ تو میں کب کی کرچکی تھی۔ نماز کی پابندی کرنے کی کوشش کرتی ہوں اور تین تسبیحات بعد نماز فجر اور عصر کی بھی پابندی کرتی ہوں اور رابطے کے لیے آپ کے درس سنتی ہوں۔بچپن سے ہی میرے دل کا رحجان روحانیت کی طرف تھا البتہ کچھ عرصہ میں اس سے دور ہوگئی مگر اللہ پاک نے میرے پر دوبارہ کرم کیا اور مجھے اپنی طرف لگالیا۔ حضرت جی آپ کا وجود میرے لیے اللہ کا کرم ہے اور میں اس پر شکر ادا کرتی ہوں۔ جب یونیورسٹی میں پڑھتی تھی تو اس زمانے میں کشف المحجوب پڑھتی تھی تو اس پر لکھا ہوتا تھا کہ اس کتاب کی برکت سے اللہ پاک پڑھنے والے کو سچا مرشد عطا کرتا ہے۔ کبھی کبھی یہی گمان گزرتا ہے کہ آپ وہی مرشد ہیں جو اللہ پاک نے کشف المحجوب پڑھنے کے بدلے مجھے عطا کیا۔ مرشد پاک کشف المحجوب میں نے پوری تو نہ پڑھی کیونکہ میرے ایک کلاس فیلو نے مجھ سے مانگی تو واپس ہی نہ کی۔ خیر یہ تو گزری باتیں ہیں۔ آپ میرے لیے دعا کیجئے میری اولاد نہیں ہے اللہ پاک مجھے اولاد عطا کرے۔میں یونیورسٹی میں ٹیچر کے طور پر پڑھاتی ہوں۔ زندگی کا نظام چل رہا ہے۔مجھے اپنی بدنصیبی پر رونا آتا ہے میں 2002 سے 2005تک لاہور میں رہی مگر مجھے آپ کا پتہ ہی نہیں تھا۔ حضرت جی میرے لیے دعا فرمادیں کہ اللہ پاک آلِ رسول کے صدقے ہی مجھے نیک اور صالح اولاد عطا فرمادے۔ آمین۔(گ، راولپنڈی)